ਰਜਤ ਪਾਟੀਦਾਰ ਬਣੇ ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਦੇ ਕਪਤਾਨ

ਨਵੀਂ ਦਿੱਲੀ- ਰਜਤ ਪਾਟੀਦਾਰ ਨੂੰ ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਦਾ ਨਵਾਂ ਕਪਤਾਨ ਨਿਯੁਕਤ ਕੀਤਾ ਗਿਆ ਹੈ। ਫਰੈਂਚਾਇਜ਼ੀ ਨੇ ਵੀਰਵਾਰ ਨੂੰ ਐਕਸ ਪੋਸਟ ਰਾਹੀਂ ਰਜਤ ਨੂੰ ਨਵਾਂ ਕਪਤਾਨ ਐਲਾਨ ਦਿੱਤਾ। ਇਸ ਤੋਂ ਪਹਿਲਾਂ ਕਿਆਸ ਲਗਾਏ ਜਾ ਰਹੇ ਸਨ ਕਿ ਵਿਰਾਟ ਕੋਹਲੀ ਨੂੰ ਕਪਤਾਨ ਬਣਾਇਆ ਜਾਵੇਗਾ, ਪਰ ਅਜਿਹਾ ਨਹੀਂ ਹੋਇਆ।

ਫਰੈਂਚਾਇਜ਼ੀ ਨੇ ਕੋਹਲੀ ਦਾ ਇਕ ਵੀਡੀਓ ਸ਼ੇਅਰ ਕੀਤਾ ਹੈ, ਜਿਸ 'ਚ ਉਨ੍ਹਾਂ ਨੇ ਪਾਟੀਦਾਰ ਨੂੰ ਕਪਤਾਨ ਬਣਾਏ ਜਾਣ 'ਤੇ ਵਧਾਈ ਦਿੱਤੀ ਹੈ। ਉਸ ਨੇ ਕਿਹਾ, 'ਰਜਤ, ਮੈਂ ਅਤੇ ਟੀਮ ਦੇ ਹੋਰ ਮੈਂਬਰ ਤੁਹਾਡੇ ਨਾਲ ਹਾਂ। ਜਿਸ ਤਰ੍ਹਾਂ ਤੁਸੀਂ ਇਸ ਫ੍ਰੈਂਚਾਇਜ਼ੀ 'ਚ ਤਰੱਕੀ ਕੀਤੀ ਹੈ ਅਤੇ ਜਿਸ ਤਰ੍ਹਾਂ ਦਾ ਪ੍ਰਦਰਸ਼ਨ ਕੀਤਾ ਹੈ, ਤੁਸੀਂ ਸਾਰੇ RCB ਪ੍ਰਸ਼ੰਸਕਾਂ ਦੇ ਦਿਲਾਂ 'ਚ ਜਗ੍ਹਾ ਬਣਾ ਲਈ ਹੈ। ਤੁਸੀਂ ਇਸ ਦੇ ਹੱਕਦਾਰ ਹੋ।'

31 ਸਾਲਾ ਪਾਟੀਦਾਰ ਫਾਫ ਡੂ ਪਲੇਸਿਸ ਦੀ ਥਾਂ ਲੈਣਗੇ। ਡੂ ਪਲੇਸਿਸ ਨੇ 2022 ਤੋਂ 2024 ਸੀਜ਼ਨ ਤੱਕ ਆਰਸੀਬੀ ਦੀ ਕਪਤਾਨੀ ਕੀਤੀ, ਪਰ ਫ੍ਰੈਂਚਾਇਜ਼ੀ ਨੇ ਉਸ ਨੂੰ 2025 ਲਈ ਬਰਕਰਾਰ ਨਹੀਂ ਰੱਖਿਆ। ਰਜਤ 2021 ਤੋਂ ਟੀਮ ਦੇ ਨਾਲ ਹੈ। ਮੈਗਾ ਨਿਲਾਮੀ-2024 ਤੋਂ ਪਹਿਲਾਂ ਫਰੈਂਚਾਇਜ਼ੀ ਨੇ ਉਸ ਨੂੰ ਬਰਕਰਾਰ ਰੱਖਿਆ ਸੀ। ਰਜਤ ਸਈਅਦ ਮੁਸ਼ਤਾਕ ਅਲੀ ਟਰਾਫੀ ਅਤੇ ਵਿਜੇ ਹਜ਼ਾਰੇ ਟਰਾਫੀ ਦੇ 2024-25 ਸੀਜ਼ਨ ਵਿੱਚ ਮੱਧ ਪ੍ਰਦੇਸ਼ ਦੇ ਕਪਤਾਨ ਰਹੇ ਹਨ।